كنعلنو ليكم، بكل فرح، انطلاقة البودكاست الجديد “ديما دايما”، اللول من نوعو بالدارجة المغربية، واللي غادي يمكن ليكم تسمعو ليه فمنصة lesbonnesondes.ma، على امتداد 8 ديال الحلقات.
هاد الإنتاج كيجي بعد تعاون ناجح بين الأستوديو المبدع ديالنا وجمعية “زيرو زبل”. من خيلالو كنهدفو نبدلو صورتنا على الزبل بصفة عامة، وندويو على هاد المشكل الكبير عالميا بطريقة فيها حس إنساني، وبزاف ديال التمغرابيت.
الهدف: خاص هاد المعضلة نفهموها فالعمق باش نحسو باللي عندنا دور فمحاربتها
الفكرة العامة هي نحطو صبعنا على هاد المشكل الكبير، ونتحملو كاملين المسؤولية، حيت بغينا ولا كرهنا كلنا فڭفة وحدة وكلنا مسؤولين بالقليل ولا بالكثير على هاد الشي اللي كنديرو.
فهاد البودكاست ما جايينش ندويو معاكم على الڭفة، ولكن غادي ندويو على الميكا تاع البلاستيك. فحلقات “ديما دايما” غادي نتلاقاو مع لالة الميكا باش تعاود لينا على حياتها اليومية، واللي خلاصتها أنها باغا تموت ولكن حتى حد ما خلاها تدير داك الشي اللي كتحلم بيه.
هاد الميكا كنلقاوها مرة هازها البرد، مرة فالبركاصات تاع مول التبقشيشة، ومرة كتدير السورف على المواج… نجمة البودكاست ديالنا متشوقة تعاود المغامرات دياولها للناس، بطريقة فيها معلومات مهمة بزاف اللي عطاوها لينا مهنيين متخصين فالعزلة ديال الزبل، ومول تبقشيشة قديم، وجمعويين، وزيد وزيد.
من الجمعة الجايا، 9 يوليوز، غادي تلاقاو أسبوعيا مع بودكاست “ديما دايما” فـ8 الحلقات، اللي ممكن تسمعو قصتها على موقعنا lesbonnesondes.ma، وعلى كل منصات الستريمينڭ.
قم بكتابة اول تعليق